A Xunta celebra no IES da Terra Chá José Trapero Pardo unha nova sesión para divulgar a cultura emprendedora e detectar os intereses da comunidade escolar

A Consellería de Promoción do Emprego e Igualdade, a través do Polo de Emprendemento e Apoio ao Emprego Lugo Sur (situado en Monforte de Lemos), continúa co ciclo de charlas divulgativas da cultura emprendedora en centros educativos da comunidade, no que hoxe participaron alumnos do Ciclo Superior en Xestión Forestal do IES da Terra Chá, José Trapero Pardo.  

O persoal do polo impartiu a primeira de tres sesións que tivo por finalidade promover actitudes favorables cara ao desenvolvemento en persoas mozas en áreas afíns aos seus gustos e capacidades. Para acadalo, celebrouse unha actividade práctica baseada na metodoloxía do Ikigai, un concepto xaponés baseado na motivación, que impulsa ás persoas a actuar.
 
A celebración destas xornadas no eido escolar permitirá á Xunta detectar as actitudes da mocidade cara a desenvolver emprendemento e obter así datos para elaborar un informe sobre os intereses e a orientación do alumnado segundo as súas áreas de residencia.