Terceira xornada de traballo para a implantación de "A Despensa de Ancares Terras de Burón"

“A Despensa de Ancares Terras de Burón” é un novo servizo que aloxamentos da zona poderán instalar para poñer a disposición dos seus hóspedes cociña de calidade elaborada por dous axentes con forte implantación no territorio: a cooperativa A Carqueixa e a Asociación de Gandeiros A Fonsagrada (ASGAFON).

Despois da presentación no mes de xuño da iniciativa, celebrando dúas xornadas para impulsar as sinerxías entre o sector agroalimentario e o turístico, o Polo de emprendemento e apoio ao emprego Montaña Lucense, en colaboración co GDR3 Montes e Vales Orientais, iniciou en Baleira un ciclo de tres xornadas de traballo para definir e implementar “A Despensa de Ancares Terras de Burón” nos aloxamentos que se adheriron ao proxecto. O próximo martes, 14 de novembro, celébrase a terceira destas xornadas, na biblioteca municipal de Baleira (Avda. Dr. Escobar s/n - 27130 Baleira), en horario de 18.00 a 21.00h.

Nas primeiras xornadas participaron dezanove persoas, representando aos hostaleiros e axentes do territorio implicados na iniciativa.

Os obxectivos principais desta terceira xornada serán consecuencia das conclusións da primeira sesión e das actuacións definidas polos participantes e desenvolvidas durante a segunda xornada. Das sete accións propostas, esperamos pechar as seguintes:

• Deseño do espazo de presentación dos produtos.
• Creación da "historia" de presentación dos produtos e produtores presentados na "Despensa".
• Estudo de rutas para distribución dos produtos perecedeiros.

Os Polos de emprendemento e apoio ao emprego levan a cabo unha prospección de potencialidades de emprendemento e de necesidades no territorio no que se asentan. Neste caso, a colaboración establecida co GDR 3 Montes e Vales Orientais foi fundamental para unha posta en marcha tan rápida da iniciativa, constituindo esta cooperación unha boa práctica que pode servir de exemplo para outras actuacións.

A actividade enmárcase no conxunto de iniciativas que a Rede de Polos de emprendemento e apoio ao emprego busca poñer en marcha nos diferentes territorios para potenciar o emprendemento aproveitando os recursos locais.