IV Foro Empresarial Lácteo: Viabilidade e eficiencia na produción de leite e sostibilidade territorial

O Polo de Coristanco participará na análise interna das granxas no IV Foro Empresarial Lácteo (21 de xaneiro)

O Polo de Emprendemento e Apoio ao Emprego de Coristanco participará activamente na primeira xornada do IV Foro Empresarial Lácteo, que se celebrará o vindeiro 21 de xaneiro e que estará centrada na análise interna das explotacións gandeiras como base para mellorar a súa viabilidade e eficiencia.

Durante a sesión abordaranse cuestións clave como a xestión económica e ambiental das granxas, o deseño da estratexia empresarial e a definición de obxectivos e protocolos de traballo. No marco desta xornada, o Polo dinamizará o Espazo aberto: Punto de Asesoramento e Remuda, un punto de encontro dirixido a gandeiros, emprendedores e persoas interesadas no relevo xeracional.

A través deste espazo, ofrecerase información personalizada sobre emprendemento, traspaso de negocios e liñas de apoio dispoñibles, reforzando o papel do Polo como axente de acompañamento para o sector lácteo e o desenvolvemento económico do rural.