🗓️ Luns, 27 de outubro de 2025 | 20:30 - 22:30 h
📍 Polo de emprendemento e apoio ao emprego de Sarria - Rúa Diego Pazos, nº20, 27600, Sarria (Lugo)

Esta actividade formativa está deseñada para ofrecer ás empresas unha comprensión clara e actualizada sobre as novas obrigas legais en materia de factura electrónica e fichaxe do persoal. Cun enfoque técnico e rigoroso, abordaranse os cambios normativos que afectan a estes aspectos clave da xestión empresarial, explicando de forma práctica como adaptarse a eles e que ferramentas poden facilitar o seu cumprimento.

Alén do contido legal e técnico, a xornada está pensada como un espazo de participación activa, onde as persoas asistentes poderán expor as súas dúbidas, compartir experiencias e trasladar necesidades específicas segundo a realidade dos seus negocios. A interacción será un eixo central, favorecendo un ambiente colaborativo e de confianza.

Un dos obxectivos fundamentais desta formación é crear comunidade entre as persoas participantes, favorecendo o coñecemento mutuo entre os distintos negocios do sector e fortalecendo as relacións profesionais a nivel local. Esta rede de contactos contribuirá a xerar sinerxías, abrir novas oportunidades de cooperación e reforzar o tecido empresarial da contorna.

Ademais, a actividade aliñase cunha visión a medio e longo prazo: a de promover a colaboración, potenciar o territorio e consolidar un ecosistema empresarial máis forte, mellor informado e preparado para afrontar os retos presentes e futuros.