Noticia_img

A Rede de polos de emprendemento e apoio ao emprego da Xunta xa prestou asesoramento personalizado a 195 persoas e axudou a desenvolver 184 proxectos

10 de marzo, 2023

A directora xeral de Emprendemento e Apoio ao Emprego, Margarita Ardado, participou hoxe por videoconferencia na xornada Marketing sostible, unha estratexia de futuro moi presente, a primeira formación en grupo dirixida aos proxectos da Rede. Destacou que a Xunta está a avogar por unha nova forma de emprender, que nace co propósito de por a disposición toda a axuda necesaria para sacar adiante negocios viables, acompañando aos proxectos de inicio a fin.

Santiago de Compostela, 9 de marzo de 2023 A directora xeral de Emprendemento e Apoio ao Emprego, Margarita Ardao, participou hoxe por videoconferencia na xornada Marketing sostible, unha estratexia de futuro moi presente, a primeira formación en grupo dirixida aos proxectos que se están a acompañar a través da Rede de polos de emprendemento e apoio ao emprego. Ardao sinalou que a Xunta está a avogar por unha nova forma de emprender, que nace co propósito de por a dispor toda a axuda necesaria para sacar adiante negocios viables e de sacar o máximo partido ao talento dos máis novos, destacando que na Rede de polos acompáñanse aos proxectos en todas as súas fases, de inicio a fin.

Atraer o emprendemento á mocidade e outorgarlle as ferramentas para que as ideas de negocio poidan xerminar é o obxectivo principal da iniciativa que puxo en marcha a Consellería de Promoción do Emprego e Igualdade o pasado ano.

En total, a Rede estará conformada por 12 polos, dos que xa están operativos cinco (Ourense centro e sur; Pontevedra norte e Rías Baixas; Costa da Morte; Lugo sur; e Rías Altas e Arco Ártabro) e nos que se ofreceu ata o de agora un asesoramento personalizado e permanente a 195 persoas emprendedoras, axudándolles a desenvolver 184 proxectos empresariais mediante a realización de máis de 610 sesións de titorización, emprendendo en sectores como a agricultura, turismo, servizos sanitarios e sociais ou xestión de residuos. É, en palabras de Ardado, unha rede “coordinada e unificada” que conta con titores expertos de primeiro nivel para garantir que as persoas interesadas sexan capaces de emprender en condicións de seguridade, favorecendo que os seus negocios se consoliden co paso do tempo.

A Xunta está a investir nesta iniciativa, que inclúe tamén axudas económicas, 9,2 millóns de euros este ano para impulsar e apoiar as iniciativas emprendedoras que xurdan en Galicia e fixar empresas no territorio, así como reter e atraer talento. Cando remate este ano, Galicia disporá de 12 polos en funcionamento repartidos nas catro provincias: 3 na Coruña, 4 en Lugo, 2 en Pontevedra e 3 en Ourense.